ધર્મા પ્રોડક્શન કરશે સિદ્ધાર્થ રાંદેરિયા અભિનીત “જિંદગી વન્સ મોર” ફિલ્મથી ગુજરાતી ફિલ્મ ઈન્ડસ્ટ્રીમાં ભવ્ય એન્ટ્રી

અમદાવાદ, ગુજરાત | ૨૦મી મે ૨૦૨૬ | પ્રાદેશિક બોક્સ ઓફિસની સફળતા અને સર્જનાત્મક ક્ષમતાને ધ્યાનમાં રાખીને, ‘વાર્તાકાર ફિલ્મ્સ’ ના સહયોગમાં નિર્માતા વાસુ ધોળકિયા છે અને દિગ્દર્શક જયમીન દ્વારા બનાવામાં આવેલ ફિલ્મ  “જિંદગી વન્સ મોર” ને ભારતના અગ્રણી સ્ટુડિયો અને પ્રોડક્શન હાઉસ ધર્મા પ્રોડક્શન્સ પ્રસ્તુત કરશે  અને એ રીતે ગુજરાતી ફિલ્મ ઉદ્યોગમાં ધર્મા પ્રોડક્શન્સ જોડાશે.

૧૯ જૂન, ૨૦૨૬ ના રોજ થિયેટરોમાં રિલીઝ થવા જઈ રહી રહેલ ફિલ્મ “જિંદગી વન્સ મોર” જેમાં ગુજરાતી મનોરંજન જગતના  બાદશાહ સિદ્ધાર્થ રાંદેરિયા  મુખ્ય ભૂમિકામાં જોવા મળશે અને સાથે  પાવરહાઉસ પરફોર્મર આરતી પટેલ પણ આ ફિલ્મમાં એક મહત્વપૂર્ણ રોલમાં નજરે આવશે. આ ફિલ્મથી દીપ ધોળકિયા અને એક આશાસ્પદ નવો ચહેરો જહાનવી  પોતાના અભિનય કરિયરની શરૂઆત કરી રહ્યા છે.

આ ફિલ્મ પિતા-પુત્રના સંબંધોની આસપાસ વણાયેલી એક અત્યંત ભાવનાત્મક અને હૃદયને સ્પર્શી જાય તેવી વાર્તા છે. તે એ હૃદયસ્પર્શી વાસ્તવિકતા પર પ્રકાશ પાડે છે કે બાળકો ભાગ્યે જ જાણી શકે છે કે તેમના જન્મ પહેલાં તેમના પિતા વાસ્તવમાં કેવા વ્યક્તિ હતા.

ફાધર્સ ડેના વીકેન્ડના અવસરે સિનેમાઘરોમાં આવી રહેલી આ ફિલ્મ તમામ પેઢીના પરિવારો માટે એક પારિવારિક ફિલ્મ બનશે.

આ ફિલ્મથી દિગ્દર્શક તરીકે જયમીન ડેબ્યૂ કરી રહ્યા છે, જ્યારે ફિલ્મની પટકથા  દીપ ધોળકિયાએ લખી છે. યંગ ટીમ દ્વારા બનેલ આ ફિલ્મ દર્શકોને ચોક્કસ ગમશે તેવી આશા ટીમે વ્યક્ત કરી સાથે ધર્મા પ્રોડક્શન્સ જેવું મોટું પ્રોડક્શન હાઉસ જોડાયને ફિલ્મને વધુ લોકો સુધી પહોંચાડવાનું માધ્યમ બનશે.

ધર્મા પ્રોડક્શન્સના સીઈઓ (CEO) અપૂર્વ મહેતાએ જણાવ્યું કે : “ધર્મા પ્રોડક્શન્સમાં અમે હંમેશા માન્યું છે કે શ્રેષ્ઠ વાર્તાઓને ભાષાના કોઈ બંધન હોતા નથી. ગુજરાતી ફિલ્મ ઉદ્યોગ હાલમાં નવા વિષયો અને વાર્તાઓનો સાક્ષી બની રહ્યો છે, અને બહોળો પ્રેક્ષક વર્ગ મળી રહ્યો છે.ત્યારે ‘જિંદગી વન્સ મોર’ સાથે આ વાઇબ્રન્ટ માર્કેટમાં પ્રવેશ કરવાનો અમોએ નિર્ણય કર્યો છે. ભવિષ્યમાં પણ આવા પ્રોજેકટ સાથે જોડાતા રહીશું.