ઈન્ડિયન ઓઈલ યુટીટી સિઝન-6: જયપુર પેટ્રિઓટ્સ દબંગ દિલ્હીને હરાવી ફાઈનલમાં; શ્રીજા અકુલા-યશાંશ મલિક 8-7ની રોમાંચક જીતમાં ઝળક્યા

ગુજરાત, અમદાવાદ ૧૩ જૂન ૨૦૨૫: ભારતીય સ્ટાર શ્રીજા અકુલા એ ઈન્ડિયન ઓઈલ અલ્ટિમેટ ટેબલ ટેનિસ સિઝન-6માં શુક્રવારે રમાયેલ સેમિફાઈનલમાં પણ પોતાનું અજેય અભિયાન જાળવી રાખ્યું હતું. આ ઉપરાંત યશાંશ મલિકે સાથિયાન જ્ઞાનસેકરનને ચોંકાવ્યો હતો. જેની મદદથી જયપુર પેટ્રિઓટ્સે દબંગ દિલ્હીને રોમાંચક મુકાબલામાં 8-7થી હરાવી ફાઈનલમાં સ્થાન મેળવ્યું હતું.

યશાંશ મલિકે દિલ્હીના કેપ્ટન સાથિયાનને 2-1(11-10, 11-9, 6-11)થી હરાવ્યો હતો. જે પછી ટાઈની અંતિમ ગેમમાં શ્રીજા અકુલા એ દિયા ચિતાલેને મજબૂત સંઘર્ષમાં મહાત આપી હતી. સેમિફાઈનલની પ્રથમ મેચમાં જયપુરના કનક ઝા એ ઈઝાક ક્વેકને હરાવી ગત હારનો બદલો લીધો. જે પછી દિલ્હીએ કમબેક કરતા મારિયા શાઓએ બ્રિટ એરલેન્ડને 2-1થી મહાત આપી. સાથિયાન/શાઓની જોડીએ મિક્સ્ડ ડબલ્સમાં જીત મેળવી દિલ્હીને 4-2ની લીડ અપાવી હતી. જે પછી યશાંશ અને શ્રીજાએ રોમાંચક મુકાબલાઓ જીતી જયપુર પેટ્રિઓટ્સને પ્રથમવાર ફાઈનલમાં સ્થાન અપાવ્યું. શ્રીજા અકુલા “ઈન્ડિયન પ્લેયર ઓફ ધ ટાઈ” અને દબંગ દિલ્હીની મારિયા શાઓ એ “ફોરેન પ્લેયર ઓફ ધ ટાઈ” ના એવોર્ડ જીત્યા. દિયા ચિતાલેને “શૉટ ઓફ ધ ટાઈ”નો એવોર્ડ મળ્યો.