Aajna Samachar
સોજીત્રા, ગુજરાત | ૧૦ જૂન ૨૦૨૬ | મધ્ય ગુજરાત વીજ કંપની લિમિટેડ (MGVCL) ના આણંદ સર્કલ હેઠળના પેટલાદ વિભાગના સોજીત્રા સબ-ડિવિઝન દ્વારા મેઘલપુર ગામમાં સ્માર્ટ મીટર સ્થાપન અભિયાન સફળતાપૂર્વક પૂર્ણ કરવામાં આવ્યું છે. ગામના તમામ વીજ ગ્રાહકોને આવરી લેતા કુલ *450 સ્માર્ટ મીટરો* સફળતાપૂર્વક સ્થાપિત કરીને મેઘલપુર ગામને સંપૂર્ણ સ્માર્ટ મીટરયુક્ત ગામ બનાવવામાં આવ્યું છે.
આ મહત્વપૂર્ણ સિદ્ધિ હાંસલ કરવામાં મેઘલપુર ગ્રામ પંચાયતના સરપંચશ્રી, પંચાયતના સભ્યો, ગામના આગેવાનો તેમજ તમામ ગ્રામજનોએ ઉત્સાહભેર સહકાર આપ્યો હતો. તેમના સકારાત્મક અભિગમ અને જાગૃતિના કારણે સ્માર્ટ મીટર સ્થાપન કામગીરી સરળતાથી અને સમયસર પૂર્ણ થઈ શકી છે.
સ્માર્ટ મીટર આધુનિક ટેકનોલોજી આધારિત વીજ મીટર છે, જે ગ્રાહકોને વીજ વપરાશની રિયલ-ટાઇમ માહિતી ઉપલબ્ધ કરાવે છે. સ્માર્ટ મીટર દ્વારા ગ્રાહકો પોતાના વીજ વપરાશ પર વધુ સારી રીતે નજર રાખી શકે છે, વીજળીના બિલમાં પારદર્શિતા જળવાઈ રહે છે તથા મીટર રીડિંગ સંબંધિત સમસ્યાઓમાં ઘટાડો થાય છે. ઉપરાંત, વીજ પુરવઠા વ્યવસ્થાપનમાં સુધારો, ટેક્નિકલ અને કોમર્શિયલ નુકસાનમાં ઘટાડો તેમજ ગ્રાહક સેવામાં ગુણાત્મક વધારો થાય છે.
MGVCL દ્વારા રાજ્ય સરકાર અને ભારત સરકારના ડિજિટલ તથા આધુનિક વીજ વ્યવસ્થાપનના વિઝનને સાકાર કરવા માટે સ્માર્ટ મીટર પ્રોજેક્ટને પ્રાથમિકતા આપવામાં આવી રહી છે. મેઘલપુર ગામમાં 100 ટકા સ્માર્ટ મીટર સ્થાપન પૂર્ણ થવું આ દિશામાં એક નોંધપાત્ર ઉપલબ્ધિ છે.
આ પ્રસંગે MGVCL ના આણંદ સર્કલ, પેટલાદ વિભાગ અને સોજીત્રા સબ-ડિવિઝનના અધિકારીઓ અને કર્મચારીઓએ ગામના સરપંચશ્રી, ગ્રામ પંચાયતના સભ્યો અને તમામ ગ્રામજનોનો હૃદયપૂર્વક આભાર વ્યક્ત કર્યો હતો. તેમણે આશા વ્યક્ત કરી હતી કે ભવિષ્યમાં પણ વીજ સેવાઓના આધુનિકીકરણ અને ગ્રાહકલક્ષી યોજનાઓના અમલીકરણમાં ગામજનોનો આવો જ સહયોગ પ્રાપ્ત થશે.
MGVCL દ્વારા ગ્રાહકોને વધુ કાર્યક્ષમ, પારદર્શક અને વિશ્વસનીય વીજ સેવાઓ પ્રદાન કરવા માટે સતત પ્રયત્નો કરવામાં આવી રહ્યા છે અને મેઘલપુર ગામની આ સિદ્ધિ અન્ય ગામો માટે પણ પ્રેરણારૂપ બનશે.
== સમાપ્ત ==
